مشترياتي من اي هيرب + تجربتي للمنتجات

كيفكم ان شالله كويسين

وعدتكم اني أرجع بحماس كيفني معاكم بس

مشترياتي من اي هيرب احب هذا الموقع وهذي أول مره أشارك مشترياتي معاكم

أول شيء بتكلم عنه زبده الكاكو (cocoa butte ) ريحتها تجنن تجنن قوامها ثقيل جداً بس ميزتها تذوب بحراره اليد وتندهن عن الجسم بسهوله الزبده الخام ريحتها أحلى من الكريمات الي تجي عطريه ويقولك بزبده الكاكو كنت متخوفه من الريحه بس الحمدلله أشتريتها بسوي بيها ديودرينت وبجربه وبعدها أقولكم رأيي

<<<<<<
ي شيء مقشر( Aveeno) لطيف جداً جداً أشتريته من مدح سناب د هند أستخدمه للمنطقه الحساسه ولاحظت نعومه

زبده للجسم من (RENWING) بالبابايا والكركدي ميزتها نباتيه وخاليه من أي كميائيات زي البارابين والسلفت قرأت أنها توحد اللون حقيقي مالاحظت بس ترطيبها يجنن قوامها ناسبني مره انا مااحب ارطب بشيء ثقيل هذي غير زبده بس ناعمه وخفيفه ولا تدهن غير ريحتها جميله جميله ولطيفه أكيد برجع اشتريها ثاني

تونر من (naw) لتفتيح البشره بالبرتقال والتوت الازق ريحته برتقال برتقال ماحبيتها مره بس كمان مو سيئه قوامه أثقل شويه من التونر العادي بحكم علي بعد مااخلص العلبه دحين لسى ماكونت أنطباع كامل

خلصنا من منتجات العنايه وجينا للمكملات الغذائيه أخدت حبوب حديد من (now) ميزتها نباتيه وتعتبر أقتصاديه مقارنه بالي في الصيدليات جربتها وحبيتها انا متعوده على فروز وهذي كمان ناسبتني دايماً عندي مشكله مع الحديد وفقر الدم

أخدت نوع ثاني من المكنلات اسمه q10 مااعرفها ولاجربتها لسى بس هيا مكمل يعطي نشاط وطاقه للجسم اذا احد جربها ياريت يقولي تجربته

أيونات الفضه انا لسى ملتعمعت في فوائدها بس هي تساعد في حالات حساسيه الانف والزكام أكيد قريب بسوي تدوينه مفصله عنها

الشيء ماقبل الأخير زيت المغنيسيوم مااتوقع في أحد ماسمع عنه مؤخرا هوا وأيونات الفضه طبعاً اتكلم عن الناس الي تحب الشيء الطبيعي والطب البديل مفيد لتشنجات وتقلصات العضلات من الرياضه وغيره حبيه وجربته لفخدي ماأعرف بالزبط اذا الي كتت أحسه بس شد او غيره بس بخيت من الزيت وسويت مساج ٣ ايام ومره تحسن الوضع وفرق كمان بسوي تدوينه عنه بجمع فيها مصادر وفديوهات توصح فوائده أكثر

اخر شيء مقلب الصراحه حقيقه ماقرأت ولاشيء حطيتها في السله من الشكل وطلعت شوكولاته ميه في الميه من مراراتها ماتتأكل علماً اني أحب الاشياء المره بستخدمها في حلى أكيد بيتغير طعمها شايفين الصوره شهتني كنت أضن وكنت أضن وخاب ضني توقعت جوتها كارميل زي الصوره وطلبت أثنين 😂

وبكذه اكون خلصت مشترياتي لو جربتوا شيء منها قولولي رأيكم واذا في شيء تنصحوني اشتري من الموقع

ودمتوا بآمان وسلام

Advertisements

مشترياتي الغريبه من معرض الكتاب

كيفكم ان شالله كويسين

بوريكم اليوم الكتب الي أشتريتها من معرض الكتاب وليش اشتريتها وبعد ما أقرئها كالعاده بسوي رفيو عنها يا هنا يا في الانستقرام

جثه في قريه تائهه ل ماريانو كيروس

العنوان شدني مره وخصوصاً ان الروايه فازت بجائزه أفضل روايه بوليسيه في الارجنتين القصه عن صحفي يروح يحقق عن أختفاء عاملين لمنظمه طبعاً هذا الملخص الي في الخلف

التناسق الخفي لتاريخ ميلادك ل جين هانر

من العنوان باين موضوع الكتاب انا احب هذي النوعيه من العلوم الي فيها اسرار زي لغه الجسد وتاريخ الميلاد والابراج وغيرها أكيد بقولكم تجربتي ورأي بعد ما اقرأه

الامعاء كنزك في بطنك ل جوليا اندرز

الي بعده شفت دكتور تكلم عنه قبل كم سنه وكان مو مترجم ودورت إذا موجود ترجمه له او لا دحين شفته مترجم وماقدرت ما أخده برضو مواضيع الصحه تهمني مره

الصلوات تبقى واحده ل تونا كيرميتشي

عنوان الكتاب يشددددد الصلوات تبقى واحده مره متحمسه للكتاب هوا فلسفي في حوارات أكثر من كونه روايه هذا الي سمعته عنه

كاريزما الانوثه ل رهام الرشيدي

الي مايعرفها رهام الرشيدي مدربه في الانوثه وأنواعها أخدت لفه في الكتاب حسيته حلو وموضوعه مفيد هي عندها برنامج اون لاين والكتاب هذا يختصره

المنزل الصيفي ل هيرمان كوخ

الروايه هذي ماسمعت عليها اي مدح أول مره اشوفها بس شدني العنوان ملخص القصه بدون حرق الي في الغلاف دكتور وغلط طبي وأجازه صيفيه شيء يشد الروايه هولنديه مترجمه

مبين عندكم أصور واشرب النسكافيه للان ماأخدت التصوير بشكل جدي جد مرهق بس برضو بتعلم

الكتاب الاخير صراحه مااعرف انطق الاسم صح فبالتالي مابكتبه😂 قصته شادتني مره وليا سنتين ادور علي مو متوفر في جرير هوا قصص قديمه متنوعه عن السحر وهاروت وماروت وعن النمرود وكثير أشياء ثانيه سمعته صوتي بس لازم أعيد أقرأه

إذا قرأتو شيء منها شاركوني واذا في ووايات او كتب من نفس النوع قولولي عليها

دمتو بآمان وسلام

طريقتي في تحقيق اهدافي (نصايح)

كيفكم ان شالله كويسين

اليوم اخر يوم في 2017 سنه جميله بكل ماتحمله الكلمه بدايه السنه اطلقت عليها سنه التجليات وفعلاً حصلت تجليات وتغيرات على جميع الاصعده

بكلمكم عن أهم النصايح الي خلتني انجز وتكون سنه حلوه عليا

* اعطي نفسك وقت .

اعطي نفسك وقت وقت للاشياء الي تحبها وقت لراحه وقت للحزن ووقت لضحك خلي كل شيء يأخد وقته وينطبخ على نار هاديه ليش العجله ؟

*اا

* ركز اكثر

ركز على نفسك ركز في كل تغير في حياتك على كل تطور على كل تجربه وكل موقف ايش رسالته وليش صار مجرد تركيز بدون تأنيب بدون تبرير التركيز يعطي أفق ابعد تفهم في نفسك وجوانب جديده فيك وخبايه عن ذاتك.

<<<

* خلي أهدافك واقعيه.

ما اقول هنا قلل سقف طموحاتك لا! بس اقول لاترهق نفسك بكثيره الاهداف البعيده والصعب الحصول عليها لانها بتوترك وتحسسك يالعجز وبالتالي بيأثر على عطائك لنفسك ومابتحقق اي هدف وبتدور في نفس الدائره .

* كون لطيف .

كون لطيف مع نفسك بدون تأنيب تقبل للعيوب لضعف والاغلاط مايعني ماتوقف مع نفسك وتعاتبها او تراجع حساباتك بس بلطف تلطف مع قلبك ونفسك وحياتك .

* تذكر وجود الكارمه .

لكل فعل ردت فعل هذا قانون فيزيائي من الثنوي وهوا يثيرني ولافتني + هذا منهج ديني من عمل مثقال ذره خير يرى ومن يعمل مثقال ذره من شر يرى استشعر هذا الشيء في كل حياتك كل كلمه ونظره وشعور مردود لك الخير بخير والشر بشر يالله كيف هذا الشعور يعطي امان ويحلي الدنيا في عيني اكثر واكثر وبمجرد شعورك بهذا الشيء بيغير كثير في حياتك وتعاملاتك في علاقاتك.

* المتعه .

زود وقت متعتك سواء بهوايات او اشخاص ممتعين يدخلوا السرور لقلبك وقت اكثر لضحك وقت اطول للمتعه قد ايش يفرق .

* الامتنان والشكر.

هذي السنه شبه يومياً اكتب امتناني الي يعرفني يعرف انه صعب عليا الالتزام في اي شيء مو مهم يومياً اقل شيء 3 ايام في الاسبوع استشعر فيها مميزات حياتي واشياء اشكر الله عليها هذا الشيء ياربي اعجز اوصف نتيجته على الحياه كيف يحسسك بالترف مهما كانت الاشياء الي تحمد الله عليها بسيطه يحسسك بالقدره والوفره يحسسك برحمه الله بيك .

* استشعر الحب

حب أشخاص حب اشياء حب مناظر حب مطاعم مناطق مدن حيوانات جمادات نباتات ايش ماكان استشعر الحب وقدم الحب لمن تقدم الحب بيرجع لك الحب .

* الرضى

كون راضي بالي وصلت له مايعني ماتحط طموحات اكيد لكل شخص طموحات بس كون راضي عن حياتك راضي عن نفسك راضي بالي عندك راضي بالحاضر وراضي بالمستقبل لو تسأل نفسك ايش سبب عدم الرضى هوا اننا نبغا اشياء ماصارت لنا طيب اعطيني ضمان بأنها لو صارت بتكون افضل من واقعك صدقني مافي ضمانات عدم الرضى زي الغشاء على العين يمنعنا من اننا نستشعر جمال حياتنا كل مارضينا جا الافضل .

* لاتحط خطه مرتبه وواضحه

ايوه زي ماقرأت ماغلطت لا تحط خطط دقيقه ايش عرفك ان خطتك هيا انسب واسهل طريقه يمكن في طريقه اسهل واحلى ايش عرفك ان هذا المستقبل الي راسمه افضل احتمال يمكن في احتمالات افضل خلي عندك مرونه في خططك وتقبل تغيرها وتكيف مع الاوضاع هذا بينعكس على حياتك بشكل سحري.

* لاتخلي شيء معلق فتره طويله .

اي شيء معلق فتره طويله ومشوش عليك سواء كانت علاقه او هدف او حلم على طول كنسله الاشياء المعلقه تعيق تقدمنا وتطورنا .

هذي كانت النصايح الي طبقتها شخصياً وخلت هذي السنه والي قبلها من اعظم سنين حياتي طبعاً مافي شيء كامل بس بشكل مجمل

حابه اشارككم بعض انجازاتي لهذي السنه

* تطور كبير في مدونتي والانستقرام .

* تعرفت على نفسي اكثر وصرت اتحكم في شعوري .

* قرأت عدد كبير من الكتب .

* خسرت حدود ١٢ كيلو

اهداف ثانيه خاصه بيا وبكذا اكون خلصت تدوينتي ان شالله تفيدكم

ودمتو بآمان وسلام

آخر افلام رعب شفتها ورأيي فيها 

كيفكم ان شالله كويسين

جد جد وحشتوني ووحشني التدوين عندي مشكله مسببه انقطاعي بتكلم فيها نهايه التدوينه وابغا رأيكم

المهم

انا مره احب أفلام الرعب وليا طقوس فيها ما اشوفها الا مع بنت خالتي أحب الي تكون عن الارواح او الجن أكثر من السفاحين والقتل

نبدأ من أخر واتفهه فلم شفته يعني اعتبري نفسك بتطلي في  سقف الغرفه يمكن تفهمي شي اكثر من الفلم لا قصه ولا احداث ولا تصوير ولاشيء صدقا ملخصه عن بنت مراقبه من الجوال والاب وبتوصلها تهديدات وبس أحس مابردت قلبي في الكلام عنه جد خساره كل دقيقه
الفلم الثاني حبيت نهايه الفلم مره وحبيت قصته بالنسبه ليا غير مكرره على اني حسيت بشويه ملل نقطه

صغيره الا انه كان شادني اغلب الوقت وابغا اعرف ايش بيصير واثار عندي اسأله لاي حد ممكن تسامح الشخص الي تحبه وايش الشيء الي ماتسامح في ؟

كيفني وانا ما احرق القصه

ملخص الفلم عن بنت وحبيبها قبل يوم زواجهم الي بيكون في قريه اهل الولد

الفلم الثالث حبيته وترني ونهايه تبرد القلب وقصه واضحه انا اكرهه اشوف فلم ساعه ساعه وعليها ولا

ولاأفهم ايش الهرجه

المهم حبيته وما اتوقع في احد ماشافه قصته عن بنت ماتسمع ولاتتكلم وفي قاتل من الافلام الي تعيشك الوضع حسيت اني مكانها وشعرت بكل شيء انصح في الي ماشافه

الفلم الرابع جد ولانفس طول الفلم منشده ومتوتره فين المتعه اني احس كذه حقيقي مافهمت ولسا احب الرعب

الفلم عن 4 او 3 اشخاص يسرقوا بيت رجال اعمى ايش تتوقوا صار حبيته ونهايته مرضيه مبين اهم شيء عندي النهايات

الفلم الخامس والاخير في هذي التدوينه يجنن وما انساه ع اني شفته قبل كم سنه

قصته حقيقيه وله 3 اجزاء كلها حلوه وانصح بيها

البوستر حق الثاني

والثالث

الموضوع الي بقولكم علي ان جوده صوري ماتعجبني وهذا الشيء مخليني ابعد وأأجل الكتابه

اذا شفتوا فلم منهم او إذا في فلم تنصحوني بي

وبس  هذي تدوينه اليوم دمتو بآمان وسلام

٨ نقاط لكعب مريح وأنيق لرجل العريضه 

كيفكم ان شالله كويسين 

وحشتوني وحشتوني من فتره طويله ماكتبت شيء حصلت تغيرات كثيره في حياتي وهذا الي أخرني المهم أني رجعتلكم بحب أكبر 

دايماً لمن نشتري صنادل الله يكرمكم نختار الشكل ونتجاهل الراحه وهذا الي يخلينا نتعب أو مانقدر نكمل بالصندل او نكمل ورجولنا تلتهب أو شيء 

جمعتلكم نصايح من وجهت نظري ساعدتني وحلتلي المشكله

النقطه الأولى  

** دائماً صاحبات الأرجل العريضه ابعدي عن الصنادل المقفله بهذا الشكل من قدام حتى لو اخترتي مقاس مناسب مابتقدري تطولي فيها لأنها بالغالب تضغط على الأصابه وكمان متعبه مع الوقت لان الجزمه ممكن توسع وتخرج الرجل او يصير أحتكاك


 نفس الصوره تنقلنا لنقطة الثانيه 

** يكون الصندل ماسك رجلك مايكون خش زي الصوره ان شالله تكونو فاهمين الوصف 

هذي أمثله لصنادل ماسكه في الرجل 

 


النقطه الثالثه 

** كعب عريض عشان تتوازني علي خصوصاً لو كان عندك زياده في الوزن وبتطولي بالكعب 

زي الصورتين الي فوق أو مديل ثاني وأريح أكثر 


معروفه بصنادل المدراسات من كثر راحتها


النقطه الرابعه 

** أختاري صندل مرتفع من قدام عشان يساعدك ويريحك أكثر ويعطيكي مجال بأنك تأخدي كعب عالي ومريح أكثر لان نزلته تكون أخف على الرجل والظهر 


النقطه الخامسه 

** ابعدي عن الصنادل المفتوحه الي ممكن تبشع شكل رجلك او تظهر أنها عريضه وماتمسك الرجل الا بشريطه بسيطه زي الصور 


والنقطه السادسه 

** الشفاف ابعدي عنه كل البعد خصوصاً لو رجعلك عريضه علماً أني اشوفه بشع في كل الحالات 


النقطه السابعه 

** أبعدي عن الصنادل المقفله من الخلف لانها تسبب أحتكاك لو طولتي هذي النقطه لكل الأرجل

النقطه الثامنه والأخيره

** أحرصي على انه فتحت الأصابع تكون مريحه وماتكون واسعه أو ضيقه لانها كلها بتسبب إحتكاك


الصور هذي توضيحيه فقط ولا المديلات متنوعه ومفتوحه 

مو شرط تتوفر كل هذي النقاط في نفس الصندل لو توفرت نقطه او نقطتين بيكون اريح

ان شالله يكون وصفي واضح وأوعدكم نرجع لعادتنا وأسبوعياً أكتب 

دمتوا بآمان وسلام 

شروط لتوأم الحياه!!

كيفكم ان شالله كويسين

موضوعي اليوم مختلف جداً الفتره الي راحت تقاطعت مع كل شيء عن الحياه الزوجيه اتكيت العلاقات انماط الازواج توأم الروح جذب الزوج

ماقصدت البحث ولاكن تلاقينا في كل الطرق لقيت أغلب الي اتابعهم ناقشوو مواضيع مشابهه وغير دوره اللزاميه من الجامعه

<<<<
تفقد المرأه جاذبيتها الموضوع الي اثار غضبي وأثر على نفسيني لباقي اليوم هل انا محدده بصفات ليحبني شريك حياتي هل هناك خطوط حمرا يجيب ان لا اتعداها ليش

سؤال كبير تكرر في داخلي

إقرأ المزيد «

فضفضه ولا استشاره؟؟ 

كيفكم ان شالله كويسين

كيفني وانا متحمسه معاكم في التدوين ؟

امس افتكرت المقوله الي تقول بمعناها انه ابغى اقابل غريب احكي اشياء كثيره ويروح بدون مايسألني عن شيء او يقابلني ثانيه ويفكرني بكلامي !

مدى احتياجنا للفضفضه وايش الفضفضه

انا بس احتاج اطلع كلام من داخلي وطاقته في قلبي مضايقتني ولا احتاج رأي ومشوره إقرأ المزيد «